رسالو ميان سچل فقير جو

رسالو ميان سچل فقير جو

رسالو ميان سچل فقير جو (ڪتاب): حضرت سچل سرمست جو رسالو، ميان علي قلي بيگ، ترتيب ڏئي، اُن جو پهريون ڀاڱو ’رسالو سچل سائينءَ جو‘ تصنيف فقير فاروقي درازن واري جو‘ عنوان سان 1902ع ۾، ميشرس هريسنگهه سنس ڪتبخانه ڇاپخانه سکر مان ڇپائي پڏرو ڪيو، ۽ اُن جو ٻيو ڀاڱو به ساڳئي ڪتبخاني مان ’رسالو ميان سچل فقير جو‘ عنوان سان 1903ع ۾ ڇپجي پڌرو ٿيو. پهرئين ڀاڱي جي مٺائي (قيمت) سوا روپيو (رعايتي) ۽ ٻئي ڀاڱي جي مٺائي ٻارهن آنا رکي وئي آهي.
هن رسالي کي تقريباً 106 سالن کان پوءِ، ڊاڪٽر نواز علي شوق جي تصديق ۽ مقدمي سان، 2008ع ۾، ثقافت ۽ سياحت کاتي، حڪومت سنڌ، ڪراچيءَ ڇپائي پڌرو ڪيو، جنهن ۾ سچل سرمست جي رسالي جي ٻنهي ڀاڱن وارو ڪلام شامل آهي.
ڊبل ڪرائون سائيز جي 960 صفحن تي مشتمل هن رسالي ۾ پهرين ٻن ڇاپن جي سر ورقن ۽ اندرين صفحن جي شروعاتي صفحن جا عڪس به ڏنا ويا آهن، ۽ هن 960 صفحن تي مشتمل رسالي جي قيمت 800 روپيا رکي وئي آهي. رسالي تي نواز علي شوق جي ٻن اکرن سان گڏ مقدمي ۾ مرزا علي قلي بيگ جي سوانح، رسالي شايع ڪندڙ، سچل سرمست جي طالبن، سچل جي دور جي سماجي ۽ سياسي حالتن ۽ شاعريءَ جو جائزو ورتل آهي. گڏوگڏ مرزا علي قلي بيگ جو اصل ديباچو به ڏنو ويو آهي.

رسالا - ڀاڱي جون ٻِيون داخلائون